| Sida laga wada dheregsanyahay gumaysiga Abasiniya & shacabka
Soomaalida Ogaadeenya ee uu gumaysto waxaa ka dhex jira khoof
& is aamini waa baaxad leh wuxuuna gumaysigu isku dayaa
in uu bulshada Soomaalida Ogaadeenya keenadiisa ogolaysiiyo
isagoo tab walba adeegsanaya danaha gumaysigu waxay u fulaan
dhawr nooc oo in badan oo ka mid ah ay dadka uu gumaysto qaar
ka mid ihi fuliyaan. Sidaas daraadeed dadka gumaysiga danihiisa
fuliya waa in ay yihiin kuwo xambaari kara xilka loo asteeyay
oo ah gumaadka & waxyeellaynta bulshada ay ka dhasheen
ee Soomaalida Ogaadeenya waxaana daruuri ah in uu gumaysigu
gacanyarihiisa aad u hufo una hubiyo nooca ay noqonayaan &
in ay buuxin karaan shuruudaha laga doonayo, adeegeyaasha
uu gumaysigu ku qanco in ay muhiim u yihiin waxay leeyihiin
sifooyin uu ku doorto waxaana u muhiimsan 2 qodob oo kala
ah.
Waa in uu doqon yahay oo uusan caqli & damiir
midna lahayn.
Waa in uu xishood & cabsida Alle meel iska dhigo.
Hadaba kolkay sidaas tahay suuro gal ma aha in uu gumaysigu
adeegsado dadka caqli usaaxiiibka ah waayo hadii uusan ruuxu
doqon ahayn waa la dhibaatayn karaa laakiin wax walba laguma
qancin karo loomana adeegsan karo in uu umadiisa waxyeello
u gaysto dhiiga shacabkiisana laguma siiyo darajooyin been
ah, Diinta islaamku waxay gashaa ruuxa caqliga leh ruuxa diintu
gashaana Iimaan kaamil ah ayuu leeyahay ruuxa Iimaanka lihina
xishood & dhawrsanaan ayuu leeyahay ruuxa sariigta leh
kama suuroowdo in uu fuliyo awaamiirta gumaysiga loomana adeegsan
karo in uu dadkiisa baabiiyo oo uu gumaysigu wax uu isagu
isaga ba'ay u xambaariyo.
Shacbka Soomaalida Ogaadeenya ee keeno diidka ah oo dulqaad
& geesinimo ma guuraan ah eebbe ku manaystay qarinyaalna
la gumaysanayay wuxuu ku jiraa halgan hiil ilaahay haysta
balse imtixaan ku lamaanyahay oo aad u khadhaadh kaas oo aan
hakanaynin ilaa guusha kama dambaysta ah ee xoriyada uu shacabka
xaqa u leh gudoomo waxaana geed ka go'an ah in uu doqonka
gumaysiga u dhago nuguli sahansanyahay oo seefta shacabka
gumaadaysa uu daabkeeda yahay isla markaasna uusan waxaba
xeerinayni.
Shacabka Soomaalida Ogaadeenya ee halgamaaga ah cadaadiska
gumaysiga & gacanyarihiisa waxay ka qaadaan dardar horleh
mana jiro wax isbadal & naruuro ah oo uu gumaysigu ka
gaadho dhibka shacabka Soomaalida Ogaadeenya loo gaysto oo
isugu jira dil, xidhay,kufsi,dhac, jidhdil & guryaha oo
laga gubo, sikasta oo shacabka loogu taagsado waxaa is dhimi
waayay dareenka wadaniga xoriyad doonka ah ee maalinba maalinta
ka dambaysa soo koraya.
Shacabka Soomaalida Ogaadeenya waxay si aad ah u takooraan
iskana uruuriyaan doqomada damiirlaaweyaasha ah ee dhagarta
qaba gumaysigana dhufayska u ah oo ah kuwo laga helay sifooyinka
kore ee uu gumaysigu ku doortay waxaana loo yaqaanaa magacyo
muujianya in ay dadkooda ka baxeen gumaysigana raaceen sida
Gacanraye, Jaajuus, Dhidid Dhawr Daboqoodhi, Dabodhilif &
Bakhti fuul oo intuba muujinaya shaqada ay hayaan ee shacabka
Soomaalida Ogaadeenya dhiibka loogu gaysanayo.
Nimanka duliga & ducfinimada qaayibay ee gumaysiga gabalkiisii
dhacay uu ku adeegto waxaa loo yeedhiyaa hawlmaalmeedkooda
oo ah xadgudubka shacabka Soomaalida Ogaadeenya waxaana damiirlaaweyaash
lagaga talaabaa togaga ceebta ee uu gumaysigu lafihiisa uga
ba'ayo, gumaysiga markii ay waxwaliba iska soo oodeen dagaalkiina
lagaga adkaaday wuxuu bilaabay dagaal dhanka saxaafada ah
wuxuuna samaystay website-yo Afsoomaali lagu qoro oo ay gacanta
ku hahayaan nimanka aan caqliga, damiirka, Iimaanka &
xishoodka toona lahayn ee Bakhti fuulka ah waxayna soo ban
dhigaan wax walba oo sharafdaro ay ka sii qaadayso xukuumada
gumaysigu waxaana banaanka u soo baxay dulmigii ay awal qarinaysay
xukuumada kalitaliska ah ee Zenawi madaxda u yahay.
Dhawrkii todobaad ee u dambeeyay waxaa socday weerar &
handadaad lagu hayo Maxaabiista Soomaalida Ogaadeenya ee Jeelasha
araxndarada ah ku jirta weerarkaas oo saxaafada cadowga lagu
soo bandhigayay wuxuu muujianyaa talo & tayo xumida gumaysiga
waxayna arimahani markhaati ka noqonayaan axmuqnimada gumaysiag
& kuwa dhidid dhawrka u ah ee waxyeelayta Soomaalida Ogaadeenya
loo wakiishay, xaqu hadii afka la qabto feedhaha ayuu ka dilaacaa
sidaas daraadeed gumaysigu isaga ayaa is fashiliyay wuxuuna
banaanka soo dhigay ceebtiisii oo aan cidna ka qarsoonayn
caalamkana waxaa maanta amakaag ku noqotay dad xoriyadoodii
laga qaaday xabsina ku jira in layidhaado horumar ayay gaadheen
ama dareenkooda ayay cabiri karaan.
Sikastaba ha ahaatee waxaa is haya hardan culusina uu ka
dhexeeyaa shacabka Soomaalida Ogaadeenya oo ay hormuud u tahay
Jabhadda Waddaniga Xoreynta Ogaadeenya (JWXO) & Jabhadda
Tigreega ee uu Zenawi hormuudka u yahay damiyada ay Askarta
Tigreegu shacabka Soomaalida Ogaadeenya ka galaana waxay hortalaa
maxkamadda caalamiga ah ee dambiyadda dagaalka waxaana xaqiiqo
ah dunuubtas uu Zenawi galayo in uu ku hambooriyi doono damiirlaaweyaasha
afsoomaaliga ku hadla oo maanta la isticmaalyo ee uu gumaysigu
ka dhigtay jaranjar uu dhiiqada kagaga gudbo waxaana nimankaas
sugaysa xisaab culus oo aakhiro & aduunba ah marka ha
iska durduurtaan dhiiga shacabkooda hana iskla darooryamaan
hana ku durduriyaan dadka masaakiinta ah ee jeelasha uga buuxa
kolbana mid haku koosaartaan wallee damiir xumoow waxa aad
umadaada gaadhsiisay waa qaan kugu maqan waxaana ku sugaya
sadex maxkamadood oo kala ah mida Zenawi mida Soomaalida Ogaadeenya
& ta ugu weyn oo ah mida Illahay.
Qormadeena Duljoogso ee maanta halkaas ayaan ku hakinaynaa
la soco qaybaha dambe.
Qaybihii hore
Xigasho: Qorahay Online |
